ഓട്ടോയിൽ ഡബ്ബിന് വന്ന ധ്യാനിന്റെ വീഡിയോ പങ്കുവെച്ച് വിനീത്
മലയാള സിനിമയിൽ അച്ഛനോട് ഒപ്പം വളർന്ന താരപുത്രന്മാരാണ് വിനീത് ശ്രീനിവാസനും ധ്യാൻ ശ്രീനിവാസനും. അച്ഛനെപോലെ തന്നെ അഭിനയവും സംവിധാനവും ഉൾപ്പെടെ ഇരുവരും കൈവെക്കാത്ത മേഖലകൾ ഇല്ല. മലയാളികൾക്ക് ഏറെ ഇഷ്ടമുള്ള താര സഹോദരന്മാർ കൂടിയാണ് ഇരുവരും. ചെറുപ്രായം മുതലേ ഇരുവരും ഉറ്റസുഹൃത്തുക്കളായാണ് വളർന്നതും. ധ്യാൻ വെള്ളിത്തിരയിലേക്ക് എത്തിയതിന് പുറകിൽ ചേട്ടനായ വിനീതിന് വലിയ പങ്കുണ്ട്.
ഇന്‍സ്റ്റാഗ്രാം പേജിലൂടെ വിനീത് പങ്കുവെച്ചിരിക്കുന്ന ധ്യാനിന്റെ രസകരമായൊരു വീഡിയോയാണ് ഇപ്പോള്‍ സോഷ്യൽ മീഡിയയിൽ വൈറലാവുന്നത്. ‘വര്‍ഷങ്ങള്‍ക്കു ശേഷത്തിന്റെ ഡബ്ബിന് വന്ന ധ്യാന്‍. എ വിശാഖ് സുബ്രഹ്മണ്യം പ്രൊഡക്ഷന്‍’ എന്നാണ് വീഡിയോയ്ക്ക് വിനീത് നല്‍കിയ ക്യാപ്ഷന്‍. ഹൃദയം എന്ന സൂപ്പര്‍ഹിറ്റ് സിനിമയ്ക്ക് ശേഷം പ്രണവ് മോഹന്‍ലാലിനെ നായകനാക്കി വിനീത് ശ്രീനിവാസന്റെ സിനിമ അണിയറയിൽ ഒരുങ്ങുകയാണ്. ‘വര്‍ഷങ്ങള്‍ക്ക് ശേഷം’ എന്ന് പേരിട്ടിരിക്കുന്ന സിനിമയുടെ പ്രീപ്രെഡക്ഷന്‍ വര്‍ക്കുകളാണ് ഇപ്പോൾ നടക്കുന്നത്.
ചിത്രത്തില്‍ വിനീതിന്റെ സഹോദരനും നടനുമായ ധ്യാന്‍ ശ്രീനിവാസനും പ്രധാനപ്പെട്ടൊരു വേഷത്തിൽ എത്തുന്നുണ്ട്. സിനിമയുടെ ഡബ്ബിങ്ങിന് വരുന്ന ധ്യാനിന്റെ വീഡിയോയാണ് ഇന്‍സ്റ്റാഗ്രാം പേജിലൂടെ വിനീത് പങ്കുവെച്ചിരിക്കുന്നത്. ധ്യാന്‍ ഒരു ഓട്ടോറിക്ഷയിലാണ് ഡബ്ബിങ് സ്റ്റുഡിയോയുടെ മുന്നില്‍ വന്നിറങ്ങുന്നത്. ഡ്രൗസറും ടീഷര്‍ട്ടുമിട്ട് വളരെ സിംപിളായി ഓട്ടോയില്‍ വരുന്ന ധ്യാനിന്റെ വീഡിയോ വിനീത് പകര്‍ത്തുകയായിരുന്നു. ശേഷം നീ ഡബ്ബിങ്ങിന് വന്നതാണോ എന്നും ചോദിക്കുന്നുണ്ട്. നിരവധി പേരാണ് ഈ വീഡിയോയുടെ താഴെ രസകരമായ കമെൻറ്റുകൾ ഇട്ടിരിക്കുന്നത്.
