ശബരിമലയില്‍ തിരക്കിന് നേരിയ ശമനം
പത്തനംതിട്ട: അഞ്ച് ദിവസത്തോളം നീണ്ടു നിന്ന കനത്ത തിരക്കിനൊടുവില്‍ ശബരിമലയില്‍ തിരക്കിന് അല്‍പം ആശ്വാസം. ഇന്ന് രാവിലെ മുതല്‍ തിരക്കിന് നേരിയ കുറവ് വന്നിട്ടുണ്ട്. നിലയ്ക്കലും സ്ഥിതി സാധാരണ നിലയിലേക്ക് എത്തി തുടങ്ങി.
എന്നാല്‍ നിലയ്ക്കലില്‍ നിന്നും പമ്പയിലേക്കുള്ള കെഎസ്ആര്‍ടിസി ബസുകളില്‍ കയറാനുള്ള തീര്‍ത്ഥാടകരുടെ ബുദ്ധിമുട്ടുകള്‍ തുടരുകയാണ്. ഇതോടെ തിരക്ക് നിയന്ത്രിക്കാന്‍ കൂടുതല്‍ ബസ് സര്‍വീസുകള്‍ നിലയ്ക്കലിലേക്കും പമ്പയിലേക്കും അവിടെ നിന്നും തിരിച്ചും ഏര്‍പ്പാടാക്കിയിട്ടുണ്ട്.
അതേസമയം, ശബരിമലയിലെ തിരക്ക് നിയന്ത്രിക്കുന്നതുമായി ബന്ധപ്പെട്ട് സ്വമേധയാ എടുത്ത കേസ് ഹൈക്കോടതി ഇന്ന് വീണ്ടും പരിഗണിക്കും. നിലവിലെ സ്ഥിതിയും സര്‍ക്കാര്‍ സ്വീകരിച്ച സംവിധാനങ്ങളും വിലയിരുത്തുകയാണ് ലക്ഷ്യം. നിലയ്ക്കലിലെ പാര്‍ക്കിങ് സംബന്ധിച്ചുള്ള വിശദാംശങ്ങളടക്കം ഹൈക്കോടതി പരിഹരിക്കും. എത്ര വാഹനങ്ങള്‍ക്ക് ഒരേ സമയം പാര്‍ക് ചെയ്യാന്‍ പറ്റും എന്നത് സംബന്ധിച്ച് പത്തനംതിട്ട ആര്‍ ടി ഒ ഹൈക്കോടതിയില്‍ റിപ്പോര്‍ട്ട് നല്‍കും. ഇതാകും ഹൈക്കോടതി വിശദമായി പരിശോധിക്കുക.തിരക്ക് നിയന്ത്രിക്കാന്‍ പുതുതായി സ്വീകരിച്ച നടപടികള്‍ സര്‍ക്കാര്‍ അറിയിക്കും.
