സൗദിയിൽ പാലക്കാട് സ്വദേശിക്ക് ദാരുണാന്ത്യം
സൗദിയിൽ ജിസാനിനടുത്ത് ദർബിൽ പാലക്കാട് സ്വദേശി കുത്തേറ്റു മരിച്ചു. മണ്ണാർക്കാട് ഒന്നാം മയിൽ കൂമ്പാറ ചേരിക്കപ്പാടം സ്വദേശി സിപി അബ്ദുൽ മജീദാണ് കൊല്ലപ്പെട്ടത്. ഇദ്ദേഹം നടത്തിവന്നിരുന്ന ശീഷ കടയിൽ വച്ചായിരുന്നു സംഭവം. നേരത്തെ കടയിൽ താൽക്കാലിക ജോലി ചെയ്തിരുന്ന ഒരു ബംഗ്ലാദേശി പൗരനെ ജോലിയിൽ നിന്നും ഇദ്ദേഹം ഒഴിവാക്കിയിരുന്നു. അയാൾ വീണ്ടും സുഹൃത്തുക്കളുമായി തിരിച്ചെത്തി മുൻ ജോലി വേണമെന്ന് ആവശ്യപ്പെട്ടപ്പോൾ ജോലിയില്ലെന്നു പറഞ്ഞ് തിരിച്ചയച്ചതിനെ തുടർന്നുണ്ടായ വാക്ക് തർക്കമാണ് കൊലപാതകത്തിൽ കലാശിച്ചത്. വാക്ക് തർക്കത്തിനിടെ ഒരാൾ കത്തികൊണ്ട് അബ്ദുൽ മജീദിന്റെ കഴുത്തിൽ കുത്തുകയും അയാൾ സംഭവസ്ഥലത്ത് വെച്ച് തന്നെ മരിക്കുകയും ആയിരുന്നു. പ്രതികളായ മൂന്നു ബംഗ്ലാദേശി പൗരന്മാരെ പോലീസ് അറസ്റ്റ് ചെയ്തിട്ടുണ്ട്. മൃതദേഹം ദർബ് ആശുപത്രി മോർച്ചറിയിലേക്ക് മാറ്റി.
