യുവാക്കളെ ആക്രമിച്ച കേസിൽ ഗുണ്ട ഡയമണ്ട് കുട്ടൻ അറസ്റ്റിൽ.

കല്ലടി മുഖത്ത് മദ്യപിച്ച് എത്തിയ യുവാക്കളെ ആക്രമിച്ച കേസിൽ ഗുണ്ട ഡയമണ്ട് കുട്ടൻ എന്ന ആദർശിനെ അറസ്റ്റ് ചെയ്തു.ഫോർട്ട് പോലീസ് ആണ് അറസ്റ്റ് ചെയ്തത്. മണക്കാട് കുര്യാത്തി എം എ എസ് കെ നഗറിൽ അജിത്തിനെയും രണ്ട് സുഹൃത്തുക്കളെയും മർദ്ധിച്ച കേസിലാണ് അറസ്റ്റ് രേഖപ്പെടുത്തിയത്. തങ്ങളുടെ പ്രദേശത്ത് മദ്യപിച്ച് അസഭ്യം വിളിച്ചു എന്ന് ആരോപിച്ചാണ് ഇവരെ കല്ലുകളും ഇരുമ്പ് കമ്പിയും ഉപയോഗിച്ച് ആക്രമിച്ചത്. മുൻപ് ആറ്റുകാൽ സ്വദേശി വിനോദിന്റെ ഗോഡൗണിൽ നിന്ന് നാല് ലക്ഷം രൂപ വില വരുന്ന അലൂമിനിയം മോഷ്ടിച്ച കേസിലും വീട്ടമ്മയെ ആക്രമിച്ച കേസിലും മണക്കാട് സ്വദേശി കുമാര ദാസിനെ സംഘം ചേർന്ന് മർദ്ദിച്ചതടക്കം നിരവധി ക്രിമിനൽ കേസുകൾ ഇയാളുടെ പേരിലുണ്ട്. ഇയാൾക്കെതിരെ കാപ്പ ചുമത്തുമെന്ന് പോലീസ് അറിയിച്ചു. കോടതിയിൽ ഹാജരാക്കിയതിനു ശേഷം റിമാൻഡ് ചെയ്യുകയായിരുന്നു. പ്രതിയുടെ സുഹൃത്തുക്കൾക്കായുള്ള അന്വേഷണം തുടരുകയാണ്. ഫോർട്ട് എ സി പി എസ് ഷാജി,സി ഐ ഷിബു, എസ് ഐമാരായ അഭിജിത്ത്, വിനോദ് അനു ശ്രീജേഷ്, ജീത്ത്, രതീഷ്, ശ്രീകുമാർ എന്നിവരാണ് അറസ്റ്റിനെ നേതൃത്വം നൽകിയത്