ലോക്‌സഭാ തെരഞ്ഞെടുപ്പ് അടുത്തിരിക്കെ മണിപ്പൂര്‍ കലാപ വിഷയത്തില്‍ മൗനം വെടിഞ്ഞ് പ്രധാനമന്ത്രി നരേന്ദ്രമോദി
ലോക്‌സഭാ തിരഞ്ഞെടുപ്പ് അടുത്തിരിക്കെ മണിപ്പൂരിലെ അശാന്തി വിഷയത്തിൽ മൗനം വെടിഞ്ഞ് പ്രധാനമന്ത്രി നരേന്ദ്ര മോദി. മണിപ്പൂരിലെ സാഹചര്യം കരുതലോടെയാണ് കൈകാര്യം ചെയ്തതെന്നാണ് പ്രധാനമന്ത്രിയുടെ പ്രതികരണം. ഇംഗ്ലീഷ് ദിനപത്രമായ അസം ട്രിബ്യൂണിന് നൽകിയ അഭിമുഖത്തിലായിരുന്നു പ്രധാനമന്ത്രിയുടെ പ്രസ്താവന. സംഘർഷാവസ്ഥയിൽ കേന്ദ്രസർക്കാർ അടിയന്തരമായി ഇടപെട്ടു. കേന്ദ്രത്തിൻ്റെ ഇടപെടലാണ് മണിപ്പൂരിനെ രക്ഷിച്ചതെന്നാണ് പ്രധാനമന്ത്രി അവകാശപ്പെടുന്നത്.
നേരത്തെ, മണിപ്പൂരിൽ സ്ഥിതി അതിരൂക്ഷമായപ്പോൾ, പ്രതിപക്ഷ പ്രതിഷേധം ദിവസങ്ങളോളം പാർലമെൻ്റിൽ തുടരുകയും തുടർന്ന് പ്രമേയം അവതരിപ്പിക്കുകയും ചെയ്തു. പ്രധാനമന്ത്രി അന്ന് പാർലമെൻ്റിൽ സംസാരിക്കുകയായിരുന്നു, എന്നാൽ മോദി ഇതുവരെ അഭിമുഖങ്ങളിലോ പൊതുവേദികളിലോ ഈ വിഷയത്തിൽ മൗനം പാലിക്കുകയാണ്. മണിപ്പൂരിനെക്കുറിച്ച് ഇതാദ്യമായാണ് പ്രധാനമന്ത്രി മാധ്യമങ്ങളോട് സംസാരിക്കുന്നത് എന്നത് ശ്രദ്ധേയമാണ്. അസം ഉൾപ്പെടെയുള്ള വടക്കുകിഴക്കൻ സംസ്ഥാനങ്ങളിൽ കേന്ദ്ര സർക്കാർ വികസന പദ്ധതികൾ നടപ്പാക്കിയിട്ടുണ്ടെന്നും പ്രധാനമന്ത്രി പറഞ്ഞു.
