ന്യൂസിലാൻ്റിൽ ചെമ്മരിയാടിന്റെ ആക്രമണത്തിൽ വൃദ്ധ ദമ്പതികൾ കൊല്ലപ്പെട്ടു
ന്യൂസിലൻഡിൽ വൃദ്ധ ദമ്പതികൾ ആടുകളുടെ ആക്രമണത്തിൽ കൊല്ലപ്പെട്ടു. ഒരാൾക്ക് പരിക്കേറ്റതായും റിപ്പോർട്ടുണ്ട്. വ്യാഴാഴ്ചയാണ് സംഭവം. ഓക്‌ലൻഡിന് പടിഞ്ഞാറുള്ള ചെറുപട്ടണമായ വൈറ്റകെരെയിലെ ഒരു പാടശേഖരത്തിലാണ് ഇരുവരെയും മരിച്ച നിലയിൽ കണ്ടെത്തിയത്. ദിവസങ്ങളോളം മാതാപിതാക്കളെ ഫോണിൽ ബന്ധപ്പെടാനാകാതെ വന്നതോടെ മകൻ അന്വേഷിച്ചിറങ്ങി. ദമ്പതികളെ പിന്നീട് മരിച്ച നിലയിൽ കണ്ടെത്തി.
സംഭവസ്ഥലം പരിശോധിച്ച പോലീസ് അക്രമി ആടാണെന്ന് തിരിച്ചറിഞ്ഞതായി മകൻ പറഞ്ഞു. പാടത്തിനടുത്തെത്തിയപ്പോൾ പ്രദേശത്ത് ആടുകളുണ്ടായിരുന്നതായും പോലീസ് പറഞ്ഞു. വൃദ്ധ ദമ്പതികളെ ആക്രമിച്ച ഒരു ആടിനെ വെടിവച്ചു കൊന്നതായും ന്യൂസിലൻഡ് പൊലീസ് അറിയിച്ചു.
