കെ എസ് ആർ ടി സി ഡ്രൈവർക്ക് ആലുവയിൽ ക്രൂരമർദ്ദനം
ഇടതുവശത്തുകൂടി വാഹനത്തെ മറികടക്കാനുള്ള ശ്രമം ചോദ്യം ചെയ്ത കെഎസ്ആർടിസി ഡ്രൈവർക്ക് സ്കൂട്ടർ യാത്രികന്റെ ക്രൂര മർദ്ദനം. ഇന്നലെ വൈകിട്ട് നാലരയോടെയാണ് മുട്ടത്ത് സംഭവം നടന്നത്.കോതമംഗലം ഡിപ്പോയിലെ ഡ്രൈവർ എം.എസ്. ജയകുമാറിനാണ് മർദ്ദനമേറ്റത്. സംഭവത്തിന്റെ വിഡിയോ പുറത്തുവന്നു. പരിക്കേറ്റ ജയകുമാർ നിലവിൽ ആശുപത്രിയിൽ ചികിത്സയിലാണ്.കൈക്കുഞ്ഞ് ഉൾപ്പെടെയുള്ളവരുമായി ഇടതുവശത്തുകൂടി കടന്നുവന്ന ഇരുചക്രവാഹനം ബസിനു മുന്നിൽ കയറ്റിനിർത്തിയത് അപകടത്തിന് ഇടയാക്കിയില്ലേ എന്ന് ചോദിച്ചതാണ് പ്രകോപനത്തിന് കാരണമായതെന്നാണ് ജയകുമാർ പറയുന്നത്.ഇതിൽ രോഷാകുലനായ യുവാവ് ബൈക്ക് നിർത്തി ഡ്രൈവറെ മർദ്ദിക്കുകയായിരുന്നു.സീറ്റിനു സമീപത്തെ വാതിലിലൂടെ വലിഞ്ഞുകയറി ഡ്രൈവറെ സീറ്റിലിട്ട് അടിക്കുന്നതും ചവിട്ടുന്നതും ദൃശ്യങ്ങളിൽ കിട്ടിയിട്ടുണ്ട്.
