യേശുദാസിന് ആശംസകളറിയിച്ച് മോഹൻലാൽ, വീഡിയോ
ശതാഭിഷേകത്തിന്‍റെ നിറവില്‍ നില്‍ക്കുന്ന മലയാളികളുടെ ഗന്ധര്‍വഗായകന്‍ കെ.ജെ യേശുദാസിന് 84-ാം പിറന്നാള്‍ ആശംസകള്‍ നേര്‍ന്ന് നടന്‍ മോഹന്‍ലാല്‍.സോഷ്യൽ മീഡിയയിൽ വീഡിയോയിലൂടെയാണ് മോഹൻലാൽ ആശംസകളറിയിച്ചത്. ‘ശതാഭിഷിക്തനാവുന്ന എൻ്റെ പ്രിയപ്പെട്ട ദാസേട്ടന് ജന്മദിനാശംസകൾ’ എന്ന തലക്കെട്ടോടെ ഫേസ്ബുക്കില്‍ പങ്കുവെച്ച വീഡിയോയിലൂടെയാണ് മോഹന്‍ലാല്‍ അദ്ദേഹത്തിന് ആശംസകള്‍ അറിയിച്ചത്.
യേശുദാസിന്റെ ശബ്ദത്തിൽ ചില ഗാനങ്ങളിലൂടെ തന്റെ സിനിമകളിൽ ചുണ്ടനക്കി പാടാനായി എന്നതാണ് സിനിമ ജീവിതത്തിലെ തന്റെ സുകൃതങ്ങളിലൊന്നായി കരുതുന്നുവെന്ന് മോഹൻലാൽ പറഞ്ഞു.ഗ്രീഷ്മത്തിലും വസന്തത്തിലും വേനലിലും വർഷത്തിലും ശിശിരത്തിലും ഹേമന്തത്തിലും മലായളി കേൾക്കുന്ന ശബ്ദം ഒന്നേയുള്ളു, അത് ഗാന ഗന്ധർവ്വൻ കെ ജെ യേശുദാസിന്റേതാണ്. നമ്മുടെ പ്രിയപ്പെട്ട ദാസേട്ടൻ, നമ്മളൊക്കെ ജനിച്ച് വളർന്നതു മുതൽ കേട്ടുപാടിയ ശബ്ദം. ആ നാദബ്രഹ്മത്തിന് എന്നും യുവത്വമാണ്. സാഗരത്തിലെന്ന പോലെ ആ നാദ ബ്രഹ്മത്തിന്റെ തിരകളിങ്ങനെ അവസാനിക്കാതെ നമ്മുടെ മനസിന്റെ തീരമണഞ്ഞുകൊണ്ടേയിരിക്കും. ഒരിക്കലും പുതുമ നശിക്കാതെ…
നൂറ്റാണ്ടില്‍ ഒരിക്കല്‍ മാത്രം സംഭവിക്കുന്ന പ്രതിഭാസമാണ് ദാസേട്ടന്. അദ്ദേഹം ജീവിക്കുന്ന കാലത്ത് ജീവിക്കാനായെന്നതില്‍ അഭിമാനമുണ്ട്. അദ്ദേഹത്തിന്‍റെ ഒരുപാട്ടെങ്കിലും ഒരു ദിവസം മൂളാത്ത മലയാളികളുിണ്ടാവില്ല. ഇന്ന് ജനുവരി പത്ത് അദ്ദേഹത്തിന്‍റെ എൺപത്തിനാലാം ജന്മദിനം. ആയിരം പൂര്‍ണചന്ദ്രന്മാരെ കണ്ട് ശതാഭിക്തനാകുന്ന ദിവസം, കാട്ടിലെ പാഴ്മുളം തണ്ടില്‍ നിന്നും പാട്ടിന്‍റെ പാലാഴി തീര്‍ത്തവനെ..ഈ സുദിനത്തില്‍ അദ്ദേഹത്തിന് ആയുരാരോഗ്യ സൗഖ്യവും ദീര്‍ഘായുസും ആശംസിക്കുന്നു ഒപ്പം പ്രാര്‍ത്ഥിക്കുന്നു’- മോഹന്‍ലാല്‍ പറഞ്ഞു.
