ചന്ദ്രമുഖി 2-വില്‍ രജനികാന്തിന്റെ വെട്ടയനെ അവതരിപ്പിച്ച് രാഘവ ലോറന്‍സ്

സിനിമ പ്രേക്ഷകർ ഏറെ ആവേശത്തോടെ കാത്തിരിക്കുന്ന ചിത്രങ്ങളിലൊന്നാണ് ചന്ദ്രമുഖി 2. രാഘവ ലോറൻസ് ആണ് ചിത്രത്തിൽ പ്രധാന വേഷത്തിൽ എത്തുന്നത്. പ്രതീക്ഷകൾക്കിടയിൽ നിർമ്മാതാക്കൾ രാഘവ ലോറൻസിന്റെ ഫസ്റ്റ് ലുക്ക് പോസ്റ്റർ പുറത്തുവിട്ടിരുന്നു. വേട്ടയൻ രാജ എന്ന കഥാപാത്രമായാണ് ചിത്രത്തിൽ രാഘവ ലോറൻസെത്തുന്നത്. 2005 ലെത്തിയ ചന്ദ്രമുഖിയിൽ രജിനികാന്ത് അവതരിപ്പിച്ച വേഷമായിരുന്നു ഇത്. പരമ്പരാഗത ആഭരണങ്ങൾ അണിഞ്ഞ് രാജകീയ വേഷത്തിൽ, ഒരു വലിയ കൊട്ടാരത്തിന്റെ പടികളിലൂടെ നടക്കുന്ന വേട്ടയന്റെ പോസ്റ്ററാണ് പുറത്തുവന്നിരിക്കുന്നത്. രജിനികാന്തിന്റെ വേട്ടയനുമായി രാഘവ ലോറൻസിന്റെ കഥാപാത്രത്തെ താരതമ്യം ചെയ്യുകയാണിപ്പോൾ സോഷ്യൽ മീഡിയ. നിരവധി പേരാണ് പോസ്റ്ററിനെ വിമർശിച്ച് രംഗത്തെത്തിയിരിക്കുന്നത്.മലയാള സിനിമയായ മണിച്ചിത്രത്താഴിന്റെ തമിഴ് റീമേക്കാണ് ചന്ദ്രമുഖി . 17 വർഷത്തിന് ശേഷമാണ് ചിത്രത്തിന് രണ്ടാം ഭാഗമൊരുങ്ങുന്നത്.പി വാസുവാണ് ചിത്രം സംവിധാനം ചെയ്യുന്നത്. വടിവേലു, കങ്കണ തുടങ്ങിയവരും ചിത്രത്തിൽ പ്രധാന വേഷത്തിലെത്തുന്നുണ്ട്. തമിഴ്, ഹിന്ദി, തെലുങ്ക്, മലയാളം, കന്നഡ ഭാഷകളിലാണ് ചിത്രമൊരുങ്ങുന്നത്. സെപ്റ്റംബർ 19 ന് ചന്ദ്രമുഖി 2 തിയേറ്ററുകളിലെത്തും. ഓസ്‌കർ ജേതാവായ എംഎം കീരവാണിയാണ് ചിത്രത്തിന് സംഗീതം നൽകിയിരിക്കുന്നത്. ഹൊറർ – കോമഡി ചിത്രമായിട്ടായിരുന്നു ചന്ദ്രമുഖി പ്രേക്ഷകരിലേക്കെത്തിയത്. ചിത്രത്തിന് ഇപ്പോഴും നിരവധി ആരാധകരാണുള്ളത്. സംഗീത സംവിധാനവും പശ്ചാത്തല സംഗീതവും നിർവ്വഹിച്ചത് വിദ്യാസാഗർ ആണ്. 890 ദിവസം തിയേറ്ററിൽ പ്രദർശിപ്പിച്ചതിന്റെ റെക്കോർഡും ചന്ദ്രമുഖി നേടിയിരുന്നു. ജർമൻ ഭാഷയിൽ ഡബ്ബ് ചെയ്യപ്പെട്ട ആദ്യത്തെ തമിഴ് ചലച്ചിത്രമാണ് ചന്ദ്രമുഖി. മനോരോഗ വിദഗ്ദ്ധനായ ശരവണൻ, വേട്ടയൻ എന്നീ കഥാപാത്രമായാണ് രജിനികാന്ത് ചിത്രത്തിലെത്തുന്നത്. ചിത്രത്തിലെ ഗാനങ്ങളൊക്കെ ഇപ്പോഴും സൂപ്പർ ഹിറ്റാണ്.പലവിധ കാരണങ്ങൾ കൊണ്ടും വലിയ പ്രതീക്ഷയോടെയാണ് ചിത്രത്തിന്റെ രണ്ടാം ഭാഗത്തെ പ്രേക്ഷകർ നോക്കികാണുന്നത്. തമിഴ്, തെലുങ്ക് സിനിമകളിൽ സജീവമാണിപ്പോൾ രാഘവ ലോറൻസ്. തെലുങ്ക് സിനിമയിലൂടെയാണ് അഭിനയരംഗത്തേക്ക് താരം കടന്നുവരുന്നത്. കാഞ്ചന എന്ന ചിത്രത്തിലെ താരത്തിന്റെ കഥാപാത്രം ഏറെ ശ്രദ്ധ നേടിയിരുന്നു. ചന്ദ്രമുഖി ആദ്യ ഭാഗത്തോട് രണ്ടാം ഭാഗം നീതി പുലർത്തുമോ എന്ന് കാത്തിരുന്ന് കാണാം.