‘ജെന്റിൽമാൻ 2’വിന്റെ ടൈറ്റിൽ മോഷൻ പോസ്റ്റർ റിലീസ് ചെയ്തു
തമിഴകം മാത്രമല്ല തെന്നിന്ത്യയാകെ ഏറ്റെടുത്ത സൂപ്പർ ഹിറ്റ് ചിത്രമായിരുന്നു അർജുൻ നായകനായെത്തിയ ജെന്റിൽമാൻ. ചിത്രത്തിന് രണ്ടാം ഭാഗം ഒരുങ്ങുന്നവെന്ന വാർത്തയും ആരാധകർ ഏറെ സന്തോഷത്തോടെയാണ് ഏറ്റെടുത്തത്. ഇപ്പോഴിതാ ചിത്രത്തിന്റെ പുതിയ അപ്ഡേറ്റാണ് എത്തിയിരിക്കുന്നത്. വെറും വാർത്തയല്ല സിനിമയുടെ ടൈറ്റിൽ മോഷൻ പോസ്റ്റർ തന്നെ റിലീസ് ചെയ്തിരിക്കുകയാണ് അണിയറ പ്രവർത്തകർ.
സിനിമയുടെ ടൈറ്റിൽ മോഷൻ പോസ്റ്റർ ആണ് റിലീസ് ചെയ്തിരിക്കുന്നത്. ഒപ്പം ചിത്രത്തിന്റെ അണിയറ പ്രവർത്തകരെ സംബന്ധിച്ച വിവരങ്ങളും വീഡിയോയിൽ ഉൾക്കൊള്ളിച്ചിട്ടുണ്ട്. ഓസ്കർ ജേതാവ് എം എം. കീരവാണിയാണ് അപ്ഡേറ്റ് പങ്കുവച്ചിരിക്കുന്നത്. ‘ ആഹാ കല്യാണം’ എന്ന സിനിമയിലൂടെ ശ്രദ്ധനേടിയ എ. ഗോകുൽ കൃഷ്ണയാണ് ചിത്രത്തിന്റെ സംവിധാനം. കെ ടി കുഞ്ഞുമോൻ ആണ് ചിത്രം നിർമ്മിക്കുന്നത്.
ഷങ്കറിന്റെ സംവിധാനത്തിൽ 1993ൽ റിലീസ് ചെയ്ത ചിത്രമാണ് ജെന്റില്‍മാന്‍. 30 വർഷങ്ങൾക്ക് ശേഷം ആണ് ചിത്രത്തിന്റെ രണ്ടാം ഭാഗം ഒരുങ്ങുന്നത്. ആദ്യഭാഗത്തേക്കാള്‍ പലമടങ്ങ് ബ്രഹ്മാണ്ഡമായിരിക്കും രണ്ടാംഭാഗമെന്നും തമിഴ്, തെലുങ്ക്, ഹിന്ദി, മലയാളം ഭാഷകളില്‍ റിലീസ് ചെയ്യുന്ന ബിഗ് ബജറ്റ് ചിത്രമായിരിക്കും ഇതെന്നും കുഞ്ഞുമോന്‍ നേരത്തെ അറിയിച്ചിരുന്നു.തമിഴ് – തെലുങ്ക് സിനിമകളിലൂടെ ശ്രദ്ധേയനായ യുവ താരം ചേതൻ ചീനു ആണ് ചിത്രത്തിലെ നായകൻ എന്ന് നേരത്തെ റിപ്പോർട്ടുകൾ വന്നിരുന്നു. മലയാളികളുടെ പ്രിയ താരം നയൻതാര ചക്രവർത്തി ആകും ചിത്രത്തിലെ നായിക.ജെൻ്റിൽമാൻ ഫിലിം ഇന്റർനാഷണലിന്റെ ബാനറിൽ നിർമ്മിക്കുന്ന ചിത്രത്തിന്റെ ഷൂട്ടിങ് ഈ മാസം 19 ന് ചെന്നൈയിൽ ആരംഭിക്കും. സംഗീത സംവിധായകന്‍ കീരവാണി, ഗാനരചയിതാവ് വൈരമുത്തു, കലാ സംവിധായകൻ തോട്ടാധരണി, ക്യാമറാമാൻ അജയൻ വിൻസെന്റ്, എഡിറ്റർ സതീഷ് സൂര്യ, സ്റ്റണ്ട് മാസ്റ്റർ ദിനേശ് കാശി എന്നിങ്ങനെ പ്രഗൽഭരായ സാങ്കേതിക വിദഗ്‌ധർ ഈ സിനിമയ്ക്കായി ഒത്തു ചേരുന്നു.
