പള്ളിക്കുന്നിന് നൊമ്പരമായി ഇമാനുവലിന്‍റെ വേർപാട്
കൂടപ്പിറപ്പിനെ സ്കൂൾ ബസ്സിൽ നിന്നും കൂട്ടാൻ ബസ്സിന് അടുത്തേക്ക് എത്തിയ എൽകെജി വിദ്യാർത്ഥി ബസ്സിനടിയിൽപ്പെട്ട് മരിച്ച സംഭവത്തിന്‍റെ ഞെട്ടലിലാണ് പള്ളിക്കുന്ന് ഗ്രാമം.വയനാട് ജില്ലയിലെ പള്ളിക്കുന്ന് മൂപ്പൻകാവ് പുലവേലിൽ ജിനോ സോസയുടെയും അനിതയുടെയും ഇളയ മകൻ ഇമ്മാനുവൽ ആണ് മരിച്ചത്. കണിയാമ്പറ്റ സർക്കാർ. എൽപി സ്കൂൾ എൽകെജിയിലാണ് പഠിക്കുന്നത്.
ബുധനാഴ്ച വൈകീട്ട് അഞ്ച് മണിയോടെയാണ് സംഭവം. ഇമ്മാനുവലിൻ്റെ ഇരട്ടസഹോദരി എറിക്കയെ സ്‌കൂളിൽ നിന്ന് കൊണ്ടുപോകാൻ സ്കൂൾ ബസ് എത്തിയപ്പോഴായിരുന്നു അപകടം. വിളമ്പുകണ്ടം കാർമ്മൽ സ്കൂളിലെ എൽ.കെ.ജി വിദ്യാർഥിനിയായ എറിക്കയെ ഇറക്കുന്നതിനിടെ ഇമ്മാനുവൽ വീട്ടിൽ നിന്നും ഇറങ്ങി സ്കൂൾ ബസ്സിന് അടുത്തെത്തുകയായിരുന്നു.
എന്നാൽ കുട്ടിയുടെ സാന്നിദ്ധ്യം ശ്രദ്ധിക്കാതെ ഡ്രൈവർ അബദ്ധത്തിൽ ബസ് ഓണാക്കിയതാണ് അപകടത്തിന് കാരണമായത്. കുട്ടിയെ ഉടൻ കൽപ്പറ്റയിലെ സ്വകാര്യ ആശുപത്രിയിൽ എത്തിച്ചെങ്കിലും മരിച്ചു. പോലീസ് സ്ഥലത്തെത്തി തുടർനടപടികൾ സ്വീകരിച്ചു. മറ്റു സഹോദരങ്ങൾ: എയ്ഞ്ചൽ തെരേസ, ആൽവിൻ ജോസ്.
