ജൂലൈ 13 ന് അമിത് ഷാ കേരളത്തില്‍….
തൃശൂർ: തദ്ദേശ തെരഞ്ഞെടുപ്പിൽ ബി.ജെ.പിയുടെ മുന്നൊരുക്കങ്ങൾക്ക് രൂപം നൽകാൻ കേന്ദ്ര ആഭ്യന്തരമന്ത്രി അമിത് ഷാ ജൂലൈ 13ന് കേരളത്തിലെത്തും.സംസ്ഥാനത്തെ ഏഴ് റവന്യൂ ജില്ലകളിലെ വാർഡ് കമ്മിറ്റി ഭാരവാഹികളുടെ യോഗത്തിൽ അദ്ദേഹം പങ്കെടുക്കാനാണ് തീരുമാനം. ബിജെപി സംസ്ഥാന ഓഫീസിൻ്റെ ഔദ്യേഗിക ഉദ്ഘാടനവും അമിത് ഷാ നിർവഹിക്കുമെന്ന് സംസ്ഥാന ജനറൽ സെക്രട്ടറി എം.ടി. രമേശ് അറിയിച്ചു . വികസിത കേരളം എന്ന ആശയം താഴെത്തട്ടിൽ എത്തിക്കാൻ പാർട്ടി രൂപം നൽകിയതായും രമേശ് പറഞ്ഞു. തൃശൂരിൽ നടന്ന സംസ്ഥാന നേതൃയോഗത്തിന് ശേഷം വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.ഓഗസ്റ്റ് ഒന്ന് മുതൽ പത്തു വരെ വാർഡ് സമ്മേളനങ്ങൾ സംഘടിപ്പിക്കുമെന്നും ഓഗസ്റ്റ് 15 ന് എല്ലാ വാർഡുകളിലും സ്വാഭിമാന ത്രിവർണ റാലികൾ നടത്തുമെന്നും അദ്ദേഹം വ്യക്തമാക്കി.അതോടൊപ്പം ബിജെപി സംസ്ഥാന സെക്രട്ടറി എസ്. സുരേഷ്, തൃശൂർ സിറ്റി ജില്ലാ പ്രസിഡൻ്റ് ജസ്റ്റിൻ ജേക്കബ് എന്നിവരും വാർത്താസമ്മേളനത്തിൽ പങ്കെടുത്തു. ബി.ജെ.പി. നയിക്കുന്ന നാഷണൽ ഡെമോക്രാറ്റിക് ഫ്രണ്ട് ഇപ്പോൾ പാലക്കാട്, പന്തളം എന്നീ രണ്ട് മുനിസിപ്പാലിറ്റികളും സംസ്ഥാനത്തെ 19 ഗ്രാമപഞ്ചായത്തുകളും നിയന്ത്രിക്കുന്നു. നിലവിൽ, മുന്നണിക്ക് സംസ്ഥാനത്തുടനീളം 1,600 ഓളം വാർഡ് അംഗങ്ങളുണ്ട്. ഇത് വർദ്ധിപ്പിക്കാനും അവർ ലക്ഷ്യമിടുന്നു.ഈ വർഷം അവസാനം നടക്കുന്ന തദ്ദേശ സ്വയംഭരണ തെരഞ്ഞെടുപ്പിൽ സ്വാധീനം ചെലുത്താൻ ലക്ഷ്യമിടുന്ന ബി.ജെ.പി. പുതിയ സംസ്ഥാന നേതൃത്വത്തിന് കീഴിൽ, പ്രധാന തന്ത്രങ്ങളും സംഘടനാപരമായ പുനർനിർമ്മാണവും നടപ്പിലാക്കാൻ ഒരുങ്ങുകയാണ്.
