ഉത്തരേന്ത്യയിൽ മൂടൽമഞ്ഞ് ശക്തിപ്രാപിച്ചതോടെ സ്ഥിതിഗതികൾ അതീവ രൂക്ഷം

ഉത്തരേന്ത്യയിൽ മൂടൽമഞ്ഞ് വർധിച്ചതോടെ സ്ഥിതി അതീവഗുരുതരമായി.ദൃശ്യപരത 50 മീറ്ററിൽ താഴെയാണ്. മൂടൽമഞ്ഞ് റോഡ്, റെയിൽ ഗതാഗതത്തെ ബാധിച്ചു. ഡൽഹി എയർപോർട്ട് കാലാവസ്ഥാ പ്രവചനം രാവിലെ 5:30 മുതൽ സീറോ മീറ്റർ ദൃശ്യപരത കാണിക്കുന്നു.2023 ഡിസംബർ 30 ന് ആരംഭിച്ച കഠിനമായ ശൈത്യകാലം ഉത്തരേന്ത്യയിൽ ഇപ്പോഴും തുടരുകയാണ്. അടുത്ത നാല് ദിവസം കൂടി കനത്ത മൂടൽ മഞ്ഞിന് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി.

തണുത്ത കാലാവസ്ഥ കാരണം അന്തരീക്ഷ മലിനീകരണം വർധിച്ചുവരികയാണ്. അന്തരീക്ഷ മലിനീകരണം വർധിക്കുന്ന സാഹചര്യത്തിൽ ദേശീയ ഹരിത ട്രൈബ്യൂണൽ ഡൽഹി എയർ ക്വാളിറ്റി മാനേജ്‌മെന്റ് കമ്മീഷനോട് റിപ്പോർട്ട് ആവശ്യപ്പെട്ടിട്ടുണ്ട്. ഈ വാർത്തയെ തുടർന്നാണ് സ്വമേധയാ നടപടി സ്വീകരിച്ചത്. നാലാഴ്ചയ്ക്കകം റിപ്പോർട്ട് സമർപ്പിക്കണം.