കരിയറിന്റെ ആദ്യത്തെ 20 വര്‍ഷം ഒന്നും തന്നെ ചിന്തിക്കാതെയാണ് ജോലി ചെയ്തത്; ശില്പഷെട്ടി
തന്റെ കഴിവിന്റേയും കഠിനാധ്വാനത്തിന്റേയും കരുത്തിൽ ബോളിവുഡിൽ വളർന്നു വന്ന നടിയാണ് ശില്‍പ ഷെട്ടി. 1993ൽ പുറത്തിറങ്ങിയ ബാസിഗർ എന്ന ത്രില്ലർ സിനിമയിലൂടെയാണ് ശില്‍പ ഷെട്ടി സ്‌ക്രീനിൽ അരങ്ങേറ്റം കുറിക്കുന്നത്. സിനിമാ പാരമ്പര്യമൊന്നുമില്ലാതെ വെള്ളിത്തിരയിലേക്ക് എത്തിയ താരം ബോളിവുഡിലെ ഐക്കോണിക് നായികമാരില്‍ ഒരാളായി മാറി. ഒരിടവേളയ്ക്ക് ശേഷം ശില്‍പ അഭിനയത്തില്‍ സജീവമായി മാറിയിരിക്കുകയാണ്.
ഇപ്പോഴിതാ പിങ്ക് വില്ലയ്ക്ക് നല്‍കിയ അഭിമുഖത്തിലൂടെ തന്റെ കരിയറിലെ ഉയര്‍ച്ചകളെക്കുറിച്ചും താഴ്ചകളെക്കുറിച്ചും മനസ് തുറന്നിരിക്കുകയാണ് ശില്‍പ ഷെട്ടി. ” എന്റെ ജീവിതത്തിൽ കയറ്റിറക്കങ്ങള്‍ ഒരുപാട് കണ്ടിട്ടുണ്ട് ഞാന്‍. ജീവിതത്തിലെ ഒരോ ഘട്ടവും നമ്മളെ എന്തെങ്കിലുമൊക്കെ പഠിപ്പിക്കും. അഭിനേതാവ് എന്ന നിലയില്‍ ഇതാണ് എന്റെ ഏറ്റവും മികച്ച സമയം. തീര്‍ത്തും വ്യത്യസ്തമായ റോളുകള്‍ തിരഞ്ഞെടുക്കാനുള്ള ധൈര്യവും എനിക്കുണ്ടായിട്ടുണ്ട്” ശില്‍പ ഷെട്ടി പറയുന്നത്.
” എന്റെ കരിയറിന്റെ ആദ്യത്തെ 20 വര്‍ഷം ഒന്നും തന്നെ ചിന്തിക്കാതെയാണ് ജോലി ചെയ്തിരുന്നത്. ഞങ്ങള്‍ തൊണ്ണൂറുകളില്‍ നിന്നും വരുന്നവരാണ്. ഞാന്‍ ജോലി ചെയ്തത് ആദ്യത്തെ കാര്‍ വാങ്ങാനും വലിയ വീട്ടിലേക്ക് മാറാനും വേണ്ടിയായിരുന്നു. മധ്യ വര്‍ഗ്ഗ കുടുംബത്തില്‍ നിന്നും വരുന്നതിനാല്‍ അന്നത്തെ 17 കാരി അതിനെയൊക്കെ നോക്കി കാണുന്നത് വേറെ രീതിയിലാകും” തന്റെ 90കളിലെ കരിയറിനെക്കുറിച്ച് ശില്‍പ പറയുന്നു.
