“ഇതിൽ മമ്മൂട്ടി സർ ഇരുക്കാറാ” ഓസ്‍ലെറിലെ മമ്മൂട്ടിയെ കാണാൻ ആവേശത്തോടെ വിജയ്
ജയറാമിനെ നായകനാക്കി മിഥുൻ മാനുവൽ തോമസ് സംവിധാനം ചെയ്ത ഏറ്റവും പുതിയ ചിത്രമാണ് അബ്രഹാം ഓസ്ലർ. ഒരിടവേളക്ക് ശേഷം ജയറാം പ്രധാന കഥാപാത്രത്തെ അവതരിപ്പിക്കുന്ന ചിത്രത്തിന് തിയേറ്ററുകളിൽ വൻ സ്വീകരണമാണ് ലഭിക്കുന്നത്. ചിത്രത്തിൽ ജയറാമിന് പുറമെ മെഗാസ്റ്റാർ മമ്മൂട്ടിയും അതിഥിവേഷത്തിലെത്തിയിരുന്നു. ഓസ്ലറില്‍ മമ്മൂട്ടി ഉണ്ടെന്നറിഞ്ഞ വിജയുടെ പ്രതികരണമാണ് ഇപ്പോള്‍ വൈറലാവുന്നത്.
വിജയ്‌യുടെ കൂടെയുള്ള ഷൂട്ടിങ്ങിനിടയിൽ ഓസ്‍ലെർ സിനിമയിൽ മമ്മൂട്ടി ഉണ്ടെന്നറിഞ്ഞ് വിജയ് ഓടിയെത്തിയെന്നും എത്രയും പെട്ടെന്ന് ചിത്രം കാണണമെന്നും പറഞ്ഞതായി ജയറാമാണ് മാധ്യമങ്ങളോട് പറഞ്ഞത്. കൊച്ചിയിൽ ഓസ്‍ലെർ സിനിമയുടെ പ്രമോഷൻ പരിപാടിയിൽ മാധ്യമപ്രവർത്തകരോട് സംസാരിക്കുമ്പോഴാണ് ജയറാം ഇക്കാര്യം പങ്കുവെച്ചത്.
‘ഇതിൽ മമ്മൂട്ടി സർ ഇരുക്കാറാ’, അങ്ങനെയെങ്കിൽ എനിക്ക് ഉടൻ തന്നെ സിനിമ കാണണം. എന്താണ് അദ്ദേഹം ചെയ്തിട്ടുള്ളതെന്ന് കാണാൻ വേണ്ടീട്ടാണ്. അത്രയും വ്യത്യസ്‌തമായിട്ട് ഓരോ പടവും സെലക്ട് ചെയ്യുന്ന അദ്ദേഹം ഈ സിനിമ സെലക്ട് ചെയ്യാനും എന്തെങ്കിലും കാരണമുണ്ടാകും. ആ കഥാപാത്രം എന്താണെന്ന് എനിക്കറിയണം എന്ന് പറഞ്ഞ് പുള്ളി പടം കാണാൻ ഏർപ്പെടാക്കിയിട്ടുണ്ട്” ജയറാം പറഞ്ഞു. മമ്മൂട്ടിയുടെ സാന്നിധ്യത്തിലാണ് ജയറാം മാധ്യമങ്ങളോട് സംസാരിച്ചത്.
