ജിവി പ്രകാശിന്റെ ‘അടിയേ’ഓഗസ്റ്റ് 25ന് തിയേറ്ററുകളിലേക്ക്
സംഗീത സംവിധായകനായും ഗായകനായും അഭിനേതാവായും പ്രേക്ഷകർക്ക് ഏറെ സുപരിചിതനാണ് ജിവി പ്രകാശ് കുമാർ. ‘സൂരറൈ പോട്ര്’ എന്ന ചിത്രത്തിലെ സംഗീതത്തിന് ദേശീയ അവാർഡും സ്വന്തമാക്കിയ ജിവി പ്രകാശ് നായകനായി പുതിയ ചിത്രം വരികയാണ്. വിഘ്നേഷ് കാർത്തിക് സംവിധാനം ചെയ്യുന്ന ‘അടിയേ’ എന്ന ചിത്രത്തിലാണ് താരം നായകനായി എത്തുന്നത്. സിനിമയുടെ റിലീസ് തിയതി പുറത്തുവിട്ടു.ഓഗസ്റ്റ് 25 ന് ആണ് ചിത്രത്തിന്‍റെ റിലീസ് . ’96’, ‘മാസ്റ്റർ’, ‘കർണൻ’ എന്നീ ചിത്രങ്ങളിലൂടെ പ്രശസ്‌തയായ ഗൗരി കിഷനാണ് ‘അടിയേ’യിൽ നായികയായി അഭിനയിക്കുന്നത്. ഏതായാലും ഏറെ നാളത്തെ കാത്തിരിപ്പിനൊടുവിൽ സിനിമയുടെ റിലീസ് തിയതി അണിയറ പ്രവർത്തകർ പുറത്തുവിട്ടതിന്‍റെ സന്തോഷത്തിലും ആവേശത്തിലുമാണ് ആരാധകർ. വെങ്കട്ട് പ്രഭു, മധുംകേഷ്, മിർച്ചി വിജയ് എന്നിവരാണ് ‘അടിയേ’യിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ജിവി പ്രകാശ് കുമാറിന്‍റെ തന്നെ മുൻ ചിത്രമായ ‘ബാച്ചിലറി’ലെ ഒരു ഗാനത്തെ പരാമർശിക്കുന്നതാണ് പുതിയ ചിത്രത്തിന്‍റെ പേര് എന്നതും ശ്രദ്ധേയമാണ്. ‘അടിയേ…’ എന്ന് തുടങ്ങുന്ന ‘ബാച്ചിലറി’ലെ ഗാനം വൻ ഹിറ്റായിരുന്നു. ജിവി പ്രകാശ് കുമാറിനൊപ്പം വിഘ്നേഷ് കാർത്തിക് കൈകോർക്കുമ്പോൾ ആരാധകരുടെ പ്രതീക്ഷകളും വാനോളമാണ്. ഒരു സയൻസ് ഫിക്ഷൻ പ്രണയ ചിത്രമാണ് ‘അടിയേ’ എന്നാണ് വിവരം. അടുത്തിടെയാണ് ചിത്രത്തിന്‍റെ ട്രെയിലർ പുറത്തുവന്നത്. ഏറെ കൗതുകമുണർത്തുന്ന രംഗങ്ങൾ കോർത്തിണക്കിയ ട്രെയിലർ മികച്ച പ്രതികരണം നേടിയിരുന്നു. 100 ദിവസത്തിലധികം തിയേറ്റർ റൺ പൂർത്തിയാക്കിയ നടൻ വിജയ്‌യുടെ ഷെൽഡ് പ്രൊജക്‌ട്, ‘യോഹാൻ: അതിയായം ഒണ്ട്രു’ എന്ന പ്രഖ്യാപനത്തോടെയാണ് ട്രെയിലർ ആരംഭിക്കുന്നത്. നേരത്തെ പുറത്തുവന്ന ചിത്രത്തിന്‍റെ മോഷൻ പോസ്റ്ററും ശ്രദ്ധ നേടിയിരുന്നു.മാലി ആൻഡ് മാൻവി മുവി മേക്കേഴ്‌സിന്‍റെ ബാനറിൽ പ്രഭ പ്രേംകുമാർ ആണ് ഈ ചിത്രത്തിന്‍റെ നിർമാണം. ജസ്റ്റിൻ പ്രഭാകരനാണ് ‘അടിയേ’ സിനിമയ്‌ക്ക് സംഗീതം ഒരുക്കുന്നത്. ഗോകുൽ ബിനോയ് ഛായാഗ്രഹണവും മുത്തയൻ യു എഡിറ്റിങ്ങും നിർവഹിക്കുന്നു.
