ശിവന്‍റെ ദൂതനായി അക്ഷയ്‌ കുമാര്‍; ‘ഓ മൈ ഗോഡ് 2’ ട്രെയിലര്‍ പുറത്ത്
ബോളിവുഡ് സൂപ്പര്‍ താരം അക്ഷയ്‌ കുമാറും , പങ്കജ് ത്രിപാഠിയും കേന്ദ്രകഥാപാത്രങ്ങളായി എത്തുന്ന ഏറ്റവും പുതിയ ചിത്രമായ ‘ഓ മൈ ഗോഡ് 2’ ട്രെയിലര്‍ റിലീസായി.കഴിഞ്ഞ ദിവസം റിലീസ് ചെയ്യേണ്ട ട്രെയിലര്‍ കലാസംവിധായകന്‍ നിതിന്‍ ദേശായിയുടെ മരണത്തെ തുടര്‍ന്ന് റിലീസ് മാറ്റിവയ്‌ക്കുകയായിരുന്നു. പങ്കജ് ത്രിപാഠിയും മകനും, അക്ഷയ്‌ കുമാറുമാണ് മൂന്ന് മിനിറ്റ് ദൈര്‍ഘ്യമുള്ള ട്രെയിലറില്‍ ഹൈലൈറ്റാകുന്നത്. പങ്കജ് ത്രിപാഠിയുടെ കഥാപാത്രത്തിന്‍റെ മകന്‍റെ ഒരു വീഡിയോ സോഷ്യല്‍ മീഡിയയില്‍ പ്രചരിക്കുകയും, തുടര്‍ന്ന് അവനെ സ്‌കൂളില്‍ നിന്നും പുറത്താക്കുകയും ചെയ്യുന്നു. ശേഷം സ്‌കൂളിനെതിരെ കേസ് കൊടുക്കാൻ തീരുമാനിക്കുകയാണ് ത്രിപാഠിയുടെ കഥാപാത്രം. തന്‍റെ പ്രശ്‌നങ്ങള്‍ പരിഹരിക്കാന്‍ ത്രിപാഠിയുടെ കഥാപാത്രം ദൈവത്തോട് പ്രാര്‍ത്ഥിക്കുകയും, ഗംഗ നദിയില്‍ നിന്നും അക്ഷയ്‌ കുമാറിന്‍റെ കഥാപാത്രം ഉയര്‍ന്നു വരികയും ചെയ്യുന്നു.ചിത്രത്തില്‍ ഭഗവാന്‍ ശിവന് ആയല്ല അക്ഷയ്‌ കുമാര്‍ എത്തുന്നത് എന്നാണ് ട്രെയിലറില്‍ നിന്നും വ്യക്തമാകുന്നത്. ശിവന്‍റെ ഒരു ദൂതനായാണ് അക്ഷയ്‌ കുമാറിന്‍റെ കഥാപാത്രം ഭൂമിയില്‍ പ്രത്യക്ഷപ്പെടുന്നത്. ഒരുപക്ഷെ സെന്‍സര്‍ ബോര്‍ഡിന്‍റെ നിര്‍ദേശപ്രകാരമാകാം ഓ മൈ ഗോഡ് 2ല്‍ അക്ഷയ്‌ കുമാര്‍ ഭഗവാന്‍ ശിവന് പകരം, ശിവന്‍റെ ദൂതനായി പ്രത്യക്ഷപ്പെടുന്നത്.
അതേസമയം, സിനിമയുടെ ആദ്യ ഭാഗത്തില്‍ അക്ഷയ്‌ കുമാര്‍, ഭഗവാന്‍ ശ്രീകൃഷ്‌ണന്‍ ആയാണ് പ്രത്യക്ഷപ്പെട്ടത്. ഓ മൈ ഗോഡില്‍ പരേഷ് റാവലിന്‍റെ കഥാപാത്രമാണ് കോടതി മുറിയില്‍ തന്‍റെ കേസ് വാദിച്ചതെങ്കില്‍, രണ്ടാം ഭാഗത്തില്‍ പങ്കജ് ത്രിപാഠിയുടെ കഥാപാത്രമാണ് തന്‍റെ മകന് വേണ്ടി കേസ് വാദിക്കുന്നത്. ഓഗസ്‌റ്റ് 2 റിലീസ് ചെയ്യാനിരുന്ന ട്രെയിലര്‍ പ്രശസ്‌ത കലാസംവിധായകന്‍ നിതിന്‍ ദേശായിയുടെ മരണത്തെ തുടര്‍ന്ന് ഓഗസ്‌റ്റ് 3 മാറ്റിവയ്‌ക്കുകയായിരുന്നു. അതേസമയം ‘ഓ മൈ ഗോഡ് 2’ന്‍റെ അഡ്വാന്‍സ് ബുക്കിംഗ് ആരംഭിച്ചിട്ടുണ്ട്. ഇക്കാര്യം അക്ഷയ്‌ കുമാര്‍ തന്‍റെ ആരാധകരെ അറിയിക്കുകയായിരുന്നു. അമിത് റായ് തിരക്കഥയെഴുതി സംവിധാനം ചെയ്ത ചിത്രം ഓഗസ്‌റ്റ് 11ന് തിയേറ്ററുകളില്‍ എത്തും. അക്ഷയ്‌ കുമാറിനെ കൂടാതെ പങ്കജ് ത്രിപാഠി, യാമി ഗൗതം ധർ, ഗോവിന്ദ് നാംദേവ്, അരുൺ ഗോവിൽ എന്നിവരും സുപ്രധാന വേഷങ്ങളിൽ എത്തുന്നു.റിലീസിനൊരുങ്ങുന്ന സിനിമയുടെ സെന്‍സറിംഗ് അടുത്തിടെ പൂര്‍ത്തിയായിരുന്നു. ‘ഓ മൈ ഗോഡ് 2’ന് എ സര്‍ട്ടിഫിക്കേറ്റാണ് സെന്‍സര്‍ ബോര്‍ഡ് നല്‍കിയത്. ചിത്രത്തിന് മേല്‍ സെന്‍സര്‍ ബോര്‍ഡ് കത്രിക വച്ചില്ലെങ്കിലും ‘ഓ മൈ ഗോഡ് 2’ല്‍ 27 ഓളം പരിഷ്‌കാരങ്ങള്‍ വരുത്താന്‍ സെന്‍സര്‍ ബോര്‍ഡ് ശുപാര്‍ശ ചെയ്‌തിട്ടുണ്ട്.
