ഇറാഖിൽ മാധ്യമങ്ങൾക്ക് ‘സ്വവർഗരതി’ എന്ന പദം ഉപയോഗിക്കുന്നതിന് വിലക്ക്

അറബ് രാജ്യത്ത് പ്രവർത്തിക്കുന്ന എല്ലാ മാധ്യമ, സോഷ്യൽ മീഡിയ കമ്പനികളോടും ഇനി മുതൽ “സ്വവർഗരതി” എന്ന പദം ഉപയോഗിക്കരുതെന്നും പകരം “ലൈംഗിക വ്യതിയാനം” എന്ന് ഉപയോഗിക്കണമെന്നും ഇറാഖിന്റെ ഔദ്യോഗിക മീഡിയ റെഗുലേറ്റർ ഉത്തരവിട്ടതായി റിപ്പോർട്ടുകൾ. ഇറാഖി കമ്മ്യൂണിക്കേഷൻസ് ആൻഡ് മീഡിയ കമ്മീഷൻ (സിഎംസി) പ്രസ്‌താവനയിൽ “ജെൻഡർ” എന്ന പദത്തിന്റെ ഉപയോഗവും നിരോധിച്ചിരിക്കുന്നതായി അറിയിച്ചിട്ടുണ്ട്. ലൈസൻസുള്ള എല്ലാ ഫോൺ, ഇന്റർനെറ്റ് കമ്പനികളെയും അവരുടെ മൊബൈൽ ആപ്ലിക്കേഷനുകളിൽ ഈ വാക്ക് ഉപയോഗിക്കുന്നതിൽ നിന്ന് വിലക്കിയിട്ടുണ്ട്. ചട്ടം ലംഘിച്ചാലുള്ള പിഴ ഇതുവരെ നിശ്ചയിച്ചിട്ടില്ലെന്നും, വൈകാതെ പിഴ ഉൾപ്പെടുത്തുമെന്നും സർക്കാർ വക്താവ് പറഞ്ഞു.ഇറാഖ് സ്വവർഗ ലൈംഗികതയെ കുറ്റകരമായി പ്രഖ്യാപിച്ചിട്ടില്ലെങ്കിലും, രാജ്യത്തെ ശിക്ഷാ നിയമത്തിലെ സദാചാര വ്യവസ്ഥകൾ എൽജിബിടി കമ്മ്യൂണിറ്റിയിലെ അംഗങ്ങളെ ലക്ഷ്യം വയ്ക്കാൻ വ്യാപകമായി ഉപയോഗിച്ചുവരുന്നുണ്ട്.സ്വീഡനിലും ഡെൻമാർക്കിലും അടുത്തിടെ നടന്ന ഖുറാൻ കത്തിച്ചതിനെതിരെ ഷിയ മുസ്ലീം വിഭാഗങ്ങൾ നടത്തിയ പ്രതിഷേധത്തിൽ മഴവില്ല് പതാകകൾ കത്തിച്ചുകളഞ്ഞതിന് പിന്നാലെ, കഴിഞ്ഞ രണ്ട് മാസമായി പ്രമുഖ ഇറാഖി പാർട്ടികൾ എൽജിബിടി അവകാശങ്ങൾക്ക് എതിരായ വിമർശനം ശക്തമാക്കിയിട്ടുണ്ട്.ലഭ്യമായ വിവരങ്ങൾ പ്രകാരം ലോകത്തിൽ 60ലധികം രാജ്യങ്ങൾ സ്വവർഗ ലൈംഗികതയെ ക്രിമിനൽ കുറ്റമായി നിശ്ചയിച്ചിട്ടുണ്ട്, അതേസമയം 130ലധികം രാജ്യങ്ങളിൽ സ്വവർഗ ലൈംഗികത നിയമപരവുമാണ്.